ساعات يلعب خيالي
يتخيل شكل بكرة
تقوم تجيله فكرة
يغير فيها حالي
ويخرج م المؤامرة
يختار له كام مغامرة
فيها عقلي يِكْسَّر قيود المعرفة
ما يخافش إنه يخسر
في عز العاصفة!
ولما يفكر يدبر
إنه يحلق بعيد
في كون تَنُّهُ يرسمه
كل ما فيه جديد ؛
نوره وصافي شديد،
ونسيمه بارد ولا دافى
هارتاح له اكيد …
أرجع بقلب طفل
ما عليهوش حمل قفل …
مفتوح بالبراءة
للدنيا فى جراءة،
يدور على ضحكته
وسهولة لعبته
في منتهى البساطة،
من غير عقد الألاطه،
وأمان وسط ناس
مشغولة بفرحة بعضها
مش باللي تحت البلاطة،
مش شايلين هم بكرة!
فجأة يرن الجرس
تقوم تطير الفكرة
تدبل وتتهرس …
وأرجع تاني لحالي
ألقانى في المؤامرة
بعيدة عن المغامرة..
بس الخيال بيتكرر
شاطر ولحوح ما ييأس،
ومسيري في يوم راح اتحرر
أعمل ما بدي ولا أزهقش،
يمكن صحيح الدنيا طموح
شراسته تخلي الخيال مكبوح
ومتضرر،
أصل الطموح ما بيتفاهمش!
لكن للحلم طاقة ما تتبرر،
أذا انكتب لها تبدأ
……مابتفرملش!
One Response
حبيبتي برافو