عـــــــــــــــــــــادى

عادى

غيابك عن حياتى

 طول عمره عادى

يا إما بتشاغل من بعيد

تقدم إيد .. وتأخر إيد..

وساعتها كنا متحييرين..

يا إما بتحب… لكن مسافر بالسنين

وساعتها كان ليك الحنين…

يا إما راجع… وويّا الأهل والصحبة

وساعتها كان ليّا الأنين

لوحدى

مطرودة م النور..

واللمة والضحكة..

أصوات على التليفون بتتلاقى،

كلمات ودايرة بتتنطط وتتشاقى

لكن تعالى كده نعد مع بعضنا

كم مرة بجد شفنا فيها بعضنا،

ودلوقتى

لما قلبى بيفتكر وينادى،

بضحك منه وأقوله:

“مالك كده مستغرب ومتكهرب ،

ماهو طول حياته من فرحته بيهرب”

ولما قلبى بيفتكر وينادى،

بشاورله على بكره…. وأقوله:

“إرمى ورا ضهرك

كل اللى كان قهرك

وإياك أشوفك تضعف قصادى

ده غيابه عنك يا قلبى

طول عمره كان عادى”